Натхненне па-за сценамі: выстаўка брэсцкай мастачкі Марыі Рэдко!

31 кастрычніка 2017 года а 16-й гадзіне ў галерэі "Панарама" Нацыянальнай бібліятэкі Беларусі (пр. Незалежнасці, 116, 22-гі паверх) адкрыецца выстаўка жывапісу Марыі Рэдко "Каля хаты".

Што кідаецца вам у вочы, калі вы выходзіце за парог хаты?.. Быццам бы ўсё звыкла. Аднак навакольны свет больш цікавы і незвычайны, чым часам здаецца. Пакідаючы межы сваёй утульнай бяспечнай прасторы, мы трапляем у зменлівы рэальны свет, поўны прыгод, новых знаёмстваў і адкрыццяў. Аб гэтым і не толькі − выстаўка таленавітай мастачкі з Брэста Марыі Рэдко.

Большасць прадстаўленых карцін створаны падчас пленэраў у перыяд з 2016 па 2017 гг. Грэчаскія Афіны, шумны Кішынёў Малдовы, маленькія вёсачкі Брэсцкай вобласці − Стойлы, Бездзеж і Какорыца... Кожнае месца, кожны горад мае свой непаўторны дух, цэласную атмасферу, што адчувае і прыкмячае мастак у сваіх карцінах. Горад глядзіць на нас сваімі вечнымі вялікімі вачыма, падморгвае шэлестам лістоты і пільна ўзіраецца ў гледача скрозь зараснікі кветак.

Асноўны накірунак у творчасці Марыі - партрэтны жывапіс. На выстаўцы можна ўбачыць партрэты дзяўчат з кветкамі, напісаныя з натуры. Спалучыўшы два ідэальныя кампаненты − прыгажосць дзяўчыны і прыроды − мастачка дадае ў гэтую кампазіцыю штосьці таямнічае і нерэальнае.

Выстаўка "Каля хаты" − гэта новы віток развіцця не толькі светаўспрымання мастачкі, але і тэхнічных прыёмаў жывапісу, які стаў больш "штрыховачным", больш графічным. Год назад Марыя ўдзельнічала ў якасці мастака-аніматара ў маляванні першага ў свеце поўнаметражнага анімацыйнага фільма "Ван Гог. З любоўю, Вінцэнт". Гэты вопыт работы аказаў моцны ўплыў на творчасць Марыі - з часам у стылі маладой мастачкі пачаў выяўляцца почырк галандскага генія.

Марыя Рэдко (1985 г.н.) − сучасная беларуская мастачка, у 2008 годзе скончыла Брэсцкі дзяржаўны ўніверсітэт імя А.С. Пушкіна, далей адточвала прафесійнае майстэрства на факультэце жывапісу Вышэйшай школы мастацтваў Вайсензее (г.Берлін, Германія). Неаднаразова прымала ўдзел у рэспубліканскіх і міжнародных выстаўках у Беларусі, Германіі, Польшчы, Расіі, Украіне, Швецыі.

31 кастрычніка 2017 года - уваход на выстаўку вольны, з 1 лістапада − складае кошт наведвання агляднай пляцоўкі!
Атрымаць асалоду ад прыгожых работ Марыі Рэдко можна да 15 снежня 2017 года. Дата заканчэння работы выстаўкі можа быць зменена!

Тэлефон для даведак: (+375 17) 266 37 37.
Е-mail: pr@nlb.by