Тэатр-лабараторыя беларускай драматургіі існуе з 1991 года і быў створаны з мэтай аказання практычнай дапамогі беларускім драматургам- пачаткоўцам у спасціжэнні законаў сцэны і з’яўляецца адным з нешматлікіх тэатраў такога кшталту. Першым кіраўніком тэатра стаў заслужаны дзеяч мастацтваў, лаўрэат Дзяржаўнай прэміі Рэспублікі Беларусь Валерый Мазынскі.

Тэатр, апраўдваючы сваё прызначэнне, вядзе індывідуальную работу з драматургамі, акцёрска-сцэнічныя чытанні п’ес, семінары з прыцягненнем рэжысёраў і іншых спецыялістаў тэатра, садзейнічае прафесійнаму станаўленню маладых аўтараў, ажыццяўляе пастаноўкі нацыянальнай драматургіі. Школу тэатра прайшлі ўжо каля трох дзясяткаў маладых аўтараў. Сярод іх Раіса Баравікова, Мікалай Рудкоўскі, Андрэй Карэлін, Дзіяна Балыка, Андрэй Курэйчык, Павел Пражко і іншыя.

З тэатрам супрацоўнічаюць таксама майстры беларускай літаратуры: Алена Папова, Сяргей Кавалёў, Георгій Марчук, Яўген Таганаў, Святлана Алексіевіч, Анатоль Дзялендзік. Разам з гэтым тэатр ажыццяўляе пастаноўкі твораў сусветнай класікі на беларускай мове (Шэкспір, Брэхт, Мальер, Дастаеўскі, Чэхаў, Булгакаў).

Замежная драматургія ў гэтым тэатры – не парадокс, а ўсвядомленая неабходнасць прафесійнай вучобы артыстаў, знаёмства гледача з найлепшымі ўзорамі сусветнага рэпертуару на роднай мове, набыццё майстэрства перакладу і, часткова, кампенсацыя недахопу добрых сучасных п’ес.

За гады існавання РТБД стаў неад’емнай часткай тэатральнай культуры Беларусі.

Значны ўнёсак у дзейнасць тэатра робяць яго майстры: народная артыстка Беларусі Таццяна Мархель, заслужаныя артысты РБ Ігар Сігаў і Валянцін Салаўёў, артысты — Людміла Сідаркевіч, Галіна Чарнабаева, Андрэй Дабравольскі, Аляксандр Марчанка, Дзяніс Паршын, Вераніка Буслаева, Наталля Халадовіч, Максім Паніматчанка, Максім Брагінец і многія іншыя.